【旅遊遊記】一齊去台北食、玩、買!・Part 3・吃貨篇

【旅遊遊記】一齊去台北食、玩、買!・Part 3・吃貨篇

因為早兩日嘅行程有啲攰,所以旅程最尾呢兩日都係以食嘢為主,想旅程輕鬆啲丫嘛~

第三日晏咗少少起身,10點左右就出發去忠孝復興嗰邊,搵咗一間叫「咖朵咖啡 Caldo Café」嘅餐廳食早餐~ 小編同朋友叫咗兩款早餐,第一款係Egg Benedict,即刻試下用刀劃開蛋嘅部分,蛋汁慢慢流出,小編已經按捺不住要食嘢喇!加上煎得好香既煙肉同火腿,同埋經典嘅荷蘭醬,實在係好吸引!

   

另外小編試左法式吐司,厚片吐司沾上蛋液之後煎到變金黃色澤,加埋吉士醬同楓糖,食落去既整體感覺同想像唔一樣,好好食!香港未食過呢個味道呀~面個層煎過後有啲脆脆哋,但底部就好似蛋糕咁軟綿綿,好鬆軟!可能因為平日嘅關係,餐廳唔係好多人,裝修有啲外國餐廳嘅感覺,都幾舒服~原來餐廳嘅咖啡豆全部都係自己烘焙,連咖啡杯入面嘅冰塊都係用咖啡製作,實在係好有心思! 就算冰塊融化,都唔會影響到咖啡的原味!冰滴咖啡係熱賣之一,每日只係可以滴取一壺,為咗保持水準而限量供應~

   

雖然食到好飽,但行過隔離街就已經見到「花甜果室」~唔係唔飲呀嘛?!小編飲嗰杯係「芭比情歸何處」,有鮮奶、穀物,同堆鮮生果汁,好味之餘又幾有飽肚感,唔錯㗎!最緊要係相機食先丫嘛!(但真係好多人,連台灣人都會刻意嚟排隊,大家要花上一定時間先會有飲品到手!)


   

食飽就去咗華山1914文化創意產業園區,的確整個園區都有住舊倉庫建築嘅特色,亦有唔同嘅展區,小編就偏愛行一啲創意設計品嘅小商店~一邊行,一邊睇吓有咩好買,所以都冇影太多相!但真心值得去行吓,特別對藝術、創意有興趣嘅朋友~

   

之後就去圓山站嘅maji maji集食行樂,成個地方圍繞住原創商品、音樂、藝術等元素,係台北較大嘅生活市集!小編先去神農市場嘅區域買咗支茶~當然因為個樽好靚所以想試一吓!的確係唔錯~而旁邊有好多手作嘅小商店同雜貨店,逐間行都會花上幾個鐘㗎!


   

喺maji maji逗留至黃昏時間,就搭的士去上引水產!因為知道只係跳一兩次錶,所以就揀搭的士喇!去到上引水產,梗係要食刺身啦!仲有超好食嘅芝士焗蠔!

   

刺身全部都好新鮮~帶子係超大粒㗎!為咗滿足一吓自己,所以決定食豪啲!要多幾隻生蠔!宜家睇返相都仍然係留晒口水,又大隻,而且好鮮甜,真係好正呀~

當然要叫返杯啤酒,慢慢享受一吓豐富嘅晚餐喇~以晚餐嚟講,都唔算係好多啫~ 食飽就返酒店休息喇!


   

第四日(行程最尾一日),出發前已經預計到行程有少少趕,但又好想去晒咁多個地方,所以決定花多少少錢包車~一早check out之後就將行理全部放晒上車,然後開始最後一日嘅旅程!一朝早就去九份,當然要食門口第一間嘅芋圓喇!其實以前都有去過九份,今次再去主要係買手信,大約行咗兩、三個鐘就行完lu~

   

朋友堅持要去返忠孝復興買星野銅鑼燒~好彩今日有包車,如果唔係就有排搭車喇!星野位於忠孝東路SOGO對面,好易就搵到~買咗兩個即場食,亦都買咗啲做手信!外好軟綿綿,甜得嚟又唔會膩,入面嘅紅豆甜度適中,而餡嘅綠茶就有啲似雪糕,真係幾好味!

   

其實都冇其他景點想去,一於數一數仲有咩想食!決定要去買Mister Donut,相信大家都一定認識呢間舖頭,分店都幾多,今次揀咗綠茶味同芒果味,一望就知道餡料超豐富喇,絕對冇令我失望!

part 1嘅時候小編喺淡水買咗postcard,所以要搵地方寄postcard! 一心想去台北車站再買手信,所以順便喺台北車站嘅郵局寄postcard~

經過見到有芝士撻同綠茶芝士撻,實在太香喇!所以決定買兩個試吓先~一啖咬落去,有流心嘅感覺!入面真係做到半熟嘅狀態,超好食!但係食兩個真係有啲膩…

最後以food court位置嘅紅燒牛肉麵結束成個旅程~(連food court嘅紅燒牛肉麵都咁濃味咁好食嘅!) 食完就係時候返香港面對現實喇…

後記:去台北真係要有重幾磅嘅心理準備呀!( ̄▽ ̄)


 

Text and photo by Celia Celeste

Facebook : https://www.facebook.com/celianceleste

 


相關文章:

【旅遊遊記】一齊去台北食、玩、買!・Part 1

【旅遊遊記】一齊去台北食、玩、買!・Part 2・包含住宿介紹!

日本最美的蔦屋書店,在台灣以全新進階版示人!

【台北遊】公共交通 v.s. 包車服務


台灣4G Wifi蛋 – 特價$35/日 (原價$60/日)

台灣機場接送服務 – 單程$116起 ▲

台灣全日包車/點到點接送 – 立即查詢

Leave a reply

Your email address will not be published. Required fields are marked *